कावासोती । नवलपरासी पूर्व नवलपुरको बौदिकाली गाउँपालिकाले साहित्यिक सर्जक र सिर्जनाको खोजीका लागि ‘अक्षर यात्रा’ अभियान शुरु गरेको छ ।

बौदिकाली गाउँपालिका प्रमुख प्रशासकीय अधिकृत कृष्णप्रसाद ज्ञवालीलका अनुसार पहाडी विकट क्षेत्रमा साहित्यिक सर्जकको खोजीका लागि अभियान शुरु गरिएको हो । । गाउँपालिकाले छवटै वडामा बिदाको दिन पारेर सर्जक र सिर्जनाको खोजी अभियान सञ्चालन गरिरहेको छ । बिदाको दिन विद्यालयमा केन्द्रित गरी विद्यार्थी र अन्य साहित्यमा रुचि भएका व्यक्तिको सहभागितामा रचना लेखन र वाचन कार्यक्रम गर्दै आएको छ ।

बिदाको दिन कर्मचारीनै परिचालन गरी गाउँपालिकाले ‘अक्षर यात्रा’ अभियान सञ्चालन गरेको छ । अभियानअन्तर्गत छैटौँ चरणको कार्यक्रम सम्पन्न गरिसकिएको प्रमुख प्रशासकीय अधिकृत ज्ञवालीले बताए । छैटौँ चरण सम्म आउँदा विभिन्न उत्कृष्ट लागेका रचना सङ्कलन गरिएको र भोलिका दिनमा लिपिबद्ध रुपमा सङ्ग्रह प्रकाशित गर्ने योजनासमेत रहेको ज्ञवालीले जानकारी दिए ।

राम्रो रचना सिर्जना गर्नेलाई भाषा प्रशिक्षण, रचना लेखनको प्रशिक्षण प्रदान गर्दै सिर्जनामा निखारता ल्याउन लागि पर्नेसमेत उनले बताए । “सिर्जनाले स्थानीय विषय वस्तु उठाउँछ, हामीलाई योजना निर्माणमा समेत सहयोग पुर्याउँछ र गाउँपालिकालाई चिनाउनसमेत मद्दत पुग्दछ”, ज्ञवालीले भने, ।

हाल गाउँपालिकाले सामान्य बजेट विनियोजन गरेर अभियान शुरु गरेको र आगामी दिनमा समेत यसलाई निरन्तरता दिँदै लैजाने गाउँपालिकाले जनाएको छ । गाउँपालिकावासीलाई रचनात्मक काम गर्न उत्पे्ररित गर्नसमेत ‘अक्षर यात्रा’ अभियानले सहयोग पुर्याउने अपेक्षा लिइएको छ ।