काठमाडौं । घर–घरमा जमरा राखेसँगै बडादशैं सुरु भएको छ । घटस्थापनाको दिन वैदिक विधिपूर्वक दशैँ घर वा पूजा कोठामा जमरा राख्ने गरिन्छ ।आईतबार काठमाडौंको हनुमानढोकास्थित दशैं घरमा घटस्थापना गरिएको छ । आईतबार बिहान शुभ साइतमै दशैं घरका गुरु ईश्वरप्रसाद अधिकारीले महकाली, महालक्ष्मी र महासरस्वती एवं महाशक्ति स्वरुपा दूर्गा भवगतीको आराधनासहित जमरा रोपण गरे । घटस्थापनालाई दशैंको पहिलो दिनको रुपमा लिईन्छ। दशैं घरमा सबैको दिर्घायू, आरोग्य, सदगुण, कामना गर्दै द्धीप, गणेश र कलशको पूजा गरी घटस्थापना गरी जमरा राखिएको गुरु अधिकारीले जानकारी दिए।

यो पल्ट घटस्थापनाको साइत नेपाल पञ्चाङ्ग निर्णायक समितिले १० बजेर ३५ मिनेटलाई तोकेको थियो । घटस्थापना गर्दा नेपाली सेनाको एक टुकडीले तोप पड्काएर हर्षबढाई गरेको थियो भने दशैं घरमा शंख, घण्टा र डमरु बजाएर दूर्गा भगवतीको पूजा, आराधना गरियो ।

दशैंको पहिलो दिन वैदिक विधिपूर्वक द्धीप, गणेश र कलशको पूजा गरी जौंको जमरा राख्ने गरिन्छ। यसरी विधिपूर्वक स्थापना गरिएको घडामाथि शक्ति स्वरुपा दूर्गा भगवतीको पूजाआराधना गरिने भएकाले त्यस दिनलाई घटस्थापना पनि भन्ने गरिएको हो। घटस्थापनाको दिन रोपिएको जमरालाई विजया दशमीको दिन शक्तिकी देवी दूर्गा भगवतीको प्रसादको रुपमा ग्रहण गर्ने गरिन्छ। जौंलाई औषधीय गुणले युक्त मानिन्छ। यसलाई उमारेर बनाइएको जमराले पनि मानवलाई निरोधी रहन सघाउ पुर्‍याउने विश्वास रही आएको छ।

दशैंमा शक्तिकी देवी दुर्गाको नौं स्वरुपको पूजा गरिन्छ। नवरात्रको पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौं दिन स्कन्दमाता, छैठौं दिन कात्यायनी, सातौं दिन कालरात्री, आठौं दिन महागौरी र नवौं दिन सिद्धीदात्रीको पूजा गरिन्छ । बडा दशैंको मुख्य दिनको रुपमा सातौं दिन फूलपाती, आठौं दिन महाअष्टमी, नवौ दिन महानवमी र दशौं दिन विजया दशमी हो। फूलपातीमा फूलपाती भित्र्याईन्छ भने महाअष्टमी र महानवमीका दिन बली पूजा गर्नेहरुले दशैं घर, कोत र शक्तिपीठहरुमा बलिसहित विशेष पूजा पनि गर्दछन । नवरात्रभर शक्तिपीठहरुमा दर्शन गर्नेहरुको भीड लाग्नेगर्दछ।