काठमाडौं । प्रेस काउन्सिल नेपालले कोरोनाबाट संक्रमित तथा मृत्यु भएका व्यक्तिहरुको पहिचान खुल्ने तस्वीर तथा अन्य विवरण सार्वजनिक नगर्न आग्रह गरेको छ ।

शनिवार कोरोनाका कारण मृत्यु भएकी सिन्धुपाल्चोककी एक महिलाको तस्विर र अन्य व्यक्तिगत विवरण सञ्चार माध्यम र सामाजिक सञ्जालमा छ्यापछ्प्ती भए पनि काउन्सिलले ध्यानाकर्षण गराएको हो।

काउन्सिलले भनेको, ‘वैयक्तिक गोपनियताको प्रतिकुल हुनुका साथै मानवीय समवेदना खल्बलिने र प्रभावित व्यक्तिलाई थप पीडा पुग्ने हुँदा आमपत्रकार, सञ्चारकर्मी, सामाजिक सञ्जाल प्रयोगकर्तालाई थप सावधानी अपनाउनतर्फ ध्यानाकर्षण गराउन चाहन्छौं।’

त्यस्तै काउन्सिलले पत्रकारितासम्बन्धी कार्य गर्दा आचारसंहिता पूर्ण रुपमा पालना गराउनसमेत आग्रह गरेको छ। युट्व च्यानलले आचारसंहितालाई उल्लंघन गर्ने क्रम बढेकाले समयमा सचेत हुन र कानुनी कारबाहीमा पर्ने चेतावनी दिएको छ।