काठमाडौं । विभागीय टिम एपीएफ क्लबले राष्ट्रिय महिला लिग फुटबलको उपाधि जितेको छ ।
सातदोबाटोस्थित एन्फा कम्प्लेक्समा बुधबार त्रिभुवन आर्मी क्लब र नेपाल पुलिस क्लबले १-१ गोलको बराबरी खेलेपछि एपीएफ च्याम्पियन बनेको हो ।
यस बराबरीसँगै एपीएफ दुई खेल अगावै च्याम्पियन बनेको हो । आर्मीले पुलिसलाई हराएको भए एपीएफलाई अर्को खेलको नतिजा कुर्नु पर्ने थियो । तर, आर्मी रोकिएपछि एपीएफले उपाधि पक्का गरेको हो ।
एपीएफले आजै विराटनगरसँग खेल्दैछ । अब एपीएफले बाँकी दुई खेल गुमाएपनि उपाधि आफ्नो बनाउनेछ ।
पुलिससँग अंक खोसेको आर्मीले पनि उपविजेताको स्थान पक्का गरेको छ ।
दुई खेल अगाडी नै च्याम्पियन बनेको एपीएफको १० खेलमा ३० अंक रहेको छ । जारी लिगमा एपीएफ अपराजित रहने एक्लो टिम हो ।
दोस्रो स्थानको आर्मीले ११ खेलमा २६ अंक जोडेको छ । विराटनगर महानगरपालिका १६ अंकसहित तेस्रो स्थानमा रहेको छ । पुलिस ११ खेलमा १५ अंक जोडेर चौंथो स्थानमा उक्लिएको छ ।
